भरतपुरमा विद्युतीय तार भूमिगत गर्ने काम सुरु, दुई वर्षभित्र निर्माण सम्पन्न हुने

भरतपुर महानगरपालिकामा विद्युतीय तार भूमिगत गर्ने काम सुरु भएको छ । नेपाल विद्युत् प्राधिकरण अन्तर्गतको पोखरा–भरतपुर वितरण प्रणाली सुदृढीकरण आयोजनाले भरतपुरमा विद्युत् वितरण प्रणालीलाई भूमिगत गर्दैछ ।

नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहालले शनिबार आयोजनाको शिलान्यास गरेका हुन् । आयोजनाको उद्घाटन गर्दै अध्यक्ष दाहालले वितरण प्रणालीलाई सुरक्षित र गुणस्तरीय सेवा प्रदान गर्ने वातावरण बनाउन आवश्यक रहेको बताए ।

अध्यक्ष दाहालले भूमिगत प्रणालीलाई भरतपुरमा मात्र नभई सिंगो चितवन जिल्लामा विस्तार गर्नुपर्ने तर्क गर्नुभयो । उनले भरतपुरले देशलाई विकासको नमुना देखाउने अवस्थामा पुगेको बताए ।

वितरण प्रणालीलाई सुदृढ र स्वचालित बनाउने उद्देश्यले तारहरू भूमिगत गर्न लागिएको आयोजनाका प्रमुख इन्जिनियर वीरेन्द्रकुमार झाले जानकारी दिनुभयो ।

सरकारले मुख्य सहर काठमाडौं, पोखरा र भरतपुरका विद्युतीय तार भूमिगत गर्न बजेट विनियोजन गरेको छ । यो काम काठमाडौं र पोखरामा सुरु भइसकेको छ । भरतपुरमा पहिलो चरणमा निर्माणाधीन ६ लेन सडक, बाइपास सडक र अन्प्तरीदेखि पुल्चोकसम्मको काम सुरु भएको छ ।

आयोजना प्रमुख झाका अनुसार पहिलो चरणमा ३१३ किलोमिटर सडकको दुबै छेउमा विद्युतीय तारहरू भूमिगत गरिनेछ । विद्युतीय तार भूमिगत गर्ने काम पनि सडक निर्माणसँग सम्बन्धित भएकाले सम्बन्धित सडक विभागसँग समन्वय गरेर काम गर्ने उनले बताए । भरतपुर महानगरपालिकाको कार्यालय अगाडि पहिलो चरणको काम सुरु भएको छ ।

एसियाली विकास बैंकको ऋण सहयोगमा भारतको बहुराष्ट्रिय कम्पनी टाटाले दुई वर्षभित्र काम सम्पन्न गर्ने ठेक्का पाएको हो । यो आयोजनाको बजेट २ अर्ब ५९ करोड रहेको छ ।

प्राधिकरणका प्रबन्ध निर्देशक कुलमान घिसिङले जीवन सुरक्षाको दृष्टिकोणले भूमिगत केबल निकै उपयोगी रहेको बताए । यसबाट भूमिगत प्रविधिबाट सुदृढीकरण गरी गुणस्तरीय, सुरक्षित र भरपर्दो विद्युत सेवा प्रदान गरी सौन्दर्यता बढाउने उनको भनाइ छ ।

कार्यक्रममा बोल्दै भरतपुर महानगरपालिकाकी मेयर रेणु दाहालले सर्वसाधारणमा निर्धारित समयमा काम नगर्ने बानी परेकाले समयमै काम सम्पन्न गर्न निर्माण कम्पनीलाई आग्रह गरिन् ।